ماذا قال الدونجوان رشدى اباظه عن الفنان محمود المليجي ولماذا انهار الاخير ؟

* رشدي اباظة : انا هقول لسيادتك حاجة يا مدام آمال تعتقدي ان احنا هنا فى مصر فيه ممثل اكبر من الاستاذ محمود المليجي؟ مفيش ..

– آمال العمدة : بنقول عليه أنتوني كوين ..

* رشدى اباظة : لا هو مش انتوني كوين لانه عمر ما محمود المليجى كان فيه عنف ، انتوني كوين اعتماده دايما على العنف حتى فى الكلمة ..

– آمال العمدة : طب هو مين ؟

* رشدى اباظة : محمود المليجي هو محمود المليجي ومش هيبقى فيه زيه ابدا ، محمود المليجي حطوه فى اطار ، حطوه في برواز اللى هو القاتل الشرير مع ان محمود المليجي عمل ادوار كان بيخلينى انا وانا عارف ان ده تمثيل اقعد اعيط ..

– آمال العمدة : تعيط ؟؟!!

* رشدي اباظة : اه طبعا اعيط وانا عارف ان ده تمثيل وعارف ازاى بيعملها ، يعنى من كتر ما هو عملاق بيتغلب على اي حاجة في الدنيا ..

– آمال العمدة : طب العملاق ده مخدش بطولات مطلقة ليه ؟ !

تملي هو بيطلع في الخلفية او فىي الادوار الثانية ..

* رشدى اباظة : عشان دور الشرير من الصعب انك تعمليه بطل ،

البطل هو اللي بيخلص على الشرير في اخر الفيلم هو ده البطل ..

– آمال العمدة : طيب لو نقلنا محمود المليجي الي السينما العالمية بقامته الفنية وتقديرك الكبير ده وانت زميل له بعد جيله بكتير ،

لكن حسيته كفنان لدرجة انه وصلك الاحساس وبتبكي وانت عارف ان ده تمثيل لو حطيناه في العالمية هل يأخذ بطولات مطلقة ؟

* رشدي اباظة : طبعا ، محمود المليجي يعمل كل الادوار وده اللي انا اتمنى اوصله في يوم من الايام المستوى ده ، محمود المليجي مفيش داعي انه يتمنى لانه وصل لكده فعلا ..

-آمال العمدة : ده تواضع يا استاذ رشدي من حضرتك انك مش قادر تقارن نفسك بمحمود المليجي ..

* رشدي اباظة : ده مش تواضع انا عارف محمود المليجي هو ايه ،هو استاذ كبير جدا ، انا ببقى فخور وانا بسلم عليه مع انه حبيبى زى اخويا ،يعنى لما بحط ايدي فى ايده بحس ان انا اخدت شيك بمليون جنيه ..

 وبعد رحيل الدنچوان رشدي أباظة اجرت آمال العمدة لقاء مع المليجي وعرضت له ما قاله رشدي عنه ،

“رشدي انت بعيد عني دلوقتي انما اعتقد انك سامعني انا مفتقدك وحشتنى اوي” ..

قال المليجي تلك الكلمات وانهمر فى البكاء ..