اشادات لمسلسل “صدفة” بسبب جرس الانذار لوزارة التعليم والكاتب يرد

– المسلسل بيناقش مشاكل المراهقين في المقام الأول وبيلقي الضوء على مشاكل كتيرة بيعانوا منها سواء في التربية أو المدرسة أو علاقتهم بأهلهم وأساتذتهم وأصحابهم.

– المسلسل بيدي جرس إنذار لوزارة التعليم على ضرورة تغطية كل المدارس بكاميرات المراقبة الكافية، وبيدي جرس انذار تاني للأهالي لمتابعة ومراقبة أولادهم وخصوصا في موضوع المخدرات والأنواع الجديدة اللي ظهرت منها الفترة الأخيرة.

– المسلسل بيمنح فرصة لوجوه شابة ووجوه جديدة كتير ومعظمهم مبشر وهايكون لهم مستقبل كبير زي نور ايهاب واحمد ابوزيد اللي بيقدم دور صاصا، وبيعيد اكتشاف نجوم كبار زي الفنان هشام منصور والفنان باتع خليل اللي مقدمين اتنين من اجمل وألطف ادوار المسلسل.

– خالد الصاوي اضافة كبيرة للمسلسل، رحاب الجمل في دور جديد عليها، ورغم أن مشاهده قليلة لكن هشام إسماعيل عامل دور دمه خفيف جدا بيفكرني بدوره في عسل أسود.

– تتر المسلسل بصوت مسلم وأوكا وريهام حجاج من (أصيع) أفكار وكلمات التترات السنة دي مع إمبراطورية ميم.

– ريهام حجاج و عصام السقا عاملين دويتو لطيف سوا وعاجبني انهم مغيرين عن ادوارهم الاخيرة وملجأوش لفكرة المنطقة الامنة او المشاهد عايز ايه ونعمله.

– ريهام حجاج عاملة دور المُدرسة صديقة الطلبة الـ trouble maker اللي حاشرة مناخيرها فكل حاجة، بدم خفيف ومبالغة محسوبة ومستغرب من الناس اللي بتنتقد موضوع اللبانة برغم إنها مظهرتش بيها غير في مشهد أو اتنين بس طول السبع حلقات، ولأول مرة بتظهر بدون سينيهات ولا ألماظات وطالعه طول المسلسل بشنطة واحدة.

– السيناريست أيمن سلامة والمخرج سامح عبدالعزيز عامل ستايل جديد لبداية الحلقات بيربطك بالحلقة اللي قبلها بشكل حلو.

– رغم إعجابي بالإيقاع لكن ده لا يمنع إنه في كذا نقطة غير منطقية في الأحداث أتمنى تجاوب عليها الحلقات الجاية، منها عصام السقا صور صدفة ليه فـ النادي ومشي وراها ليه بالعربية وفضل قاعد قصاد المدرسة ليه؟.

من جانبه، علق أيمن سلامة مؤلف مسلسل صدفة على كلام الناقد الفني عبدالله غلوش قائلا:« بشكر الاستاذ الكبير عبدالله غلوش، ورأيك هذا مهم جدا بالنسبة لي لاني بحترم اراءك وبالنسبة لسؤالك الاخير فالاجابة هاتكون مفاجأة في الحلقات القادمة .. مافيش حاجة صدفة يااستاذ عبدالله  اشكرك جدا»