الموقع – مجلة الكترونية فنية شاملة elmaw2a3
متابعة/ حسانة سليم
حل النجم أحمد حلمي ضيفا على الإعلامي أنس بوخش، خلال برنامج Abs talk، حيث كشف خلالها عن أبرز المحطات في حياته الفنية والشخصية بالإضافة إلى سبب استمرار زواجه من الفنانة منى زكي وذكريات طفولته..وفيما يلي أبرز تصريحات أحمد حلمي، حيث قال:”عشت ظروف مادية قاسية في طفولتي والدي اشتغل بالسعودية ورجعنا لمصر وحاول استثمار فلوسه وخسرها..اعتمدت على نفسي واشتغلت أكثر من شغلانة وقت دراستي وكنت برسم على زجاج المحلات وبعمل ديزاينات وديكورات المسرح واشتغلت في مطبعة للملابس، عمري ماتخيلت إني هيبقى معايا فلوس وأبقى مشهور، الناس بتقول إن بعد سنين من الجواز الحب بيختفي لكن في جملة كانت ضمن فيلم وأحد الأبطال وضّح الفرق بين الحب قبل الزواج وبعده، وقال إن المرحلة الأولى اسمها مرحلة الوقوع في الحب، متزوج من منى زكي من عام 2002 والجواز حياة مختلفة وأهم شيء في الزواج هو الوصول للغة الثالثة لأن الرجل عنده لغة بيتكلمها والست عندها لغة بتتكلمها وزي ما يكون هو بيتكلم إنجليزي وهي فرنساوي وفي لغة تالتة مشتركة وهي إن الاتنين يتعلموا لغات بعض، بيتقال إن لما مراتك تبقى متخانقة في الشغل أو مع صاحبتها وانت تقول رأيك وتلبس قبعة الحكيم هي هتضايق وانت مش هتفهم ليه اضايقت لأنها عايزة تتسمع بس وبعد ما تخلص اسألها عن رأيها وبعدها قول رأيك، منى سند حقيقي وبتمثل البلورة اللى أنا عايش فيها وبشوف نفسى من خلالها وزى ما بيقولوا وراء كل رجل عظيم امرأة أعظم منه المفروض.. ومنى عندها كمية كبيرة من الصدق بهتت عليا”.ولفت الفنان إلى أنه شخص مليء بالتناقضات ولا يفضل أمرا معينا، مشيرا إلى أنه قضى معظم طفولته خارج مصر وكان ينتظر الإجازة للعودة..وتحدث أحمد حلمي عن طفولته، وقال إنه وقع في غرام سيدة كبيرة “خالة صاحبه” وهو في سن صغيرة، قائلا:” كان عندي 6 سنين”.. كما قال : “أتمنى الناس تفتكرني بحاجات ملهاش علاقة بالفن والسينما، أتمنى الناس اللي قابلتهم وليا معاهم مواقف انسانية هما اللي يفتكروني، وشوفت دا في جنازة أبويا، ناس مكناش نعرفها لكن أبويا كان بيساعدهم، نفسي جنازتي يبقى متواجد فيها الناس دي مش بس المعجبين.”
