دوللي شاهين:” مافيش سينما نظيفة وأقدمت على الانتحار والشللية مسيطرة بالفن”

متابعة/ حسانة سليم

حلت النجمة دوللي شاهين ضيفة على أحد البرامج التلفزيونية، مساء أمس، وتحدثت خلال اللقاء عن تفاصيل حياتها الشخصية وعلاقتها بوالديها، كما كشفت عن رأيها في دخول ابنتها الوسط الفني.. ومن ابرز تصريحاتها:

-طفولتي ما كنتش لطيفة وعلاقتي بأهلي ووالدي بالذات ماكنتش كويسة لكن ماما كانت زي الملاك.

–  في سن مُعينة كنت عاملة زي الولد وبتعامل زي الولد.

– بابا أثر فيا أكتر من ماما لأن شخصيته قوية جدًا وماما اتجوزت بابا وهي عندها 14 سنة وهو كان عنده 34 سنة، ونقدر نقول أن هو اللي ربى ماما.

–  التربية الشرقية للأسف بتربي البنت أنها تشيل المسؤولية والبيت بدري.

– مكنش عندي فتى أحلام، بابا كان راجل شرقي بزيادة وكان عنده قيود كتيرة وكان كل أحلامي إني اتحرر من قيوده، قبل ما أفكر مين فتى أحلامي.

– أول جيبة لبستها في حياتي جاتلي هدية وأنا عندي 13 سنة، والدي قطعهالي علشان يقهرني ويضايقني.

– كان كل هدفي إني اتحرر من عقلية والدي المتخلفة دي اللي أنا عايشة فيها، هو كان شايف إني مش حلوة وأنا دايمًا بقول البني آدم اللي عنده مشاكل بتكون من الطفولة وممكن والدي كان كده.

– بعيش دلوقي قصة حب، والحب حاجة جميلة ولكن اللي يقدر قيمة الحب، وأؤمن بالحب الزيادة وأن الحب أهم من أي حاجة في الدنيا، ولغاية دلوقتي مقتنعة أن لسة في أمل في الحب.

– أنا هدعم بنتي في أي حاجة هي عايزاها وأنا بغير عليها جدًا ولكني ست عقلانية، مقدرش أمنعها من حاجة محدش قدر يمنعني منها يعني بابا وجبروته ده كله مقدرش يمنعني.

– أنا حاولت أنتحر كذا مرة والموت أهون عندي ولكن محدش يحدد مستقبلي، فمينفعش أجي دلوقتي بعد العمر ده كله أتحكم في مستقبل بنتي.

– أنا محبش إن بنتي تدخل الوسط الفني لأنه تعب وشقى وعذاب ومش هيبقى عندها ضهر زي ما أنا معنديش ضهر ومعنديش حد يدعمني، وساعات بقعد من غير شغل علشان الوسط والشللية، وده اللي بقوله لبنتي.

– مفيش حاجة اسمها سينما نظيفة.