3نصايح لحمو بيكا..”عشان مايفرحش اوي لاستقالة امير الغناء العربي”

يص يا بني انا لا اعرفك ولا اعرف المطرب الكبير هاني شاكر شخصيا.. بس بص يابني متقارنش نفسك وانت ابن امبارح لسة مطلعتش من البيضة وحكايتك علي الله فعلا والله بمطرب اجيال ظهر في عهد العندليب الاسمر(والعندليب الاسمر عشان متوعاش علي حاجة زى كدة ده كان مطرب غلبان في نفسه وصحته كدة اسمه عبد الحليم حافظ الله يرحمه) وشجعه هو بنفسه.. طبعا انت فتوة وعضلات متجيش حاجة جنب الغلبان عبد الحليم حافظ..

ثانيا يابني والله المطرب الكبير هاني شاكر ده درس نوتة ودرس مقامات وعود وارتام وراح في حتة كدة اسمها كلية التربية الموسيقية.. انت طبعا ثقافتك غيره خالص.. فانت راجل خريج دبلوم صنايع والبخت مش ضايع طبعا.. دانت راجل علمت عليه وخليتو يستقيل من منصب نقيب المهن الموسيقية عشان يستريح من مرازيتك… يا عم بالراحة علي الراجل ده بياكل عيش برضه وبيجري علي عيال راجل موظف في هيئة حكومية اللي هيه النقابة مش زيك عنده فرقة وفاتح الفين تلاتلاف بيت… بالهداوة شوية عليه مش كدة.. ده راجل في مقام والدك برضو..

تالت هام يا صحبي ودي المفاجاة بقي اللي ممكن تلخبط خططك المستقبلية.. ان النقابة رفضت طلب امير الرومانسية هاني شاكر بالاستقالة وخليتو يتراجع عنها… ده معناه انه لو رجع وقرا تعليقك اللي في البوست الممول ده(انا راجع.. غصبن عن الجواجع)  هيقل منك والله بجد يا زميلي

البوست ده هيدينك امسحه معلش يا صحبي اخوك العبد لله بياكل عيش برضه وخريج اعلام اي نعم ودارس صحافة في جامعة القاهرة ايام التسعينيات التعليم المجاني يعني..واشتغل مع ناس كبار في المجال زي مصطفي حسين و سمير الجمل وجمال الشويخ… ف يعني مش من مقامك برضو.  بس قدر  اخوك الكبير خايف عليك… ف معلش…//  اوعي متجيش سكة مع اللي حافظ السكة