احمد الفيشاوي:” أنا كنت سلفي وبقيت صوفي وكنت إخواني لمدة سنتين ومش هاشيل التاتو”

متابعة/ حسانة سليم

حل النجم احمد الفيشاوي ضيفًا على أحد البرامج التلفزيونية، وتحدث خلال اللقاء عن تفاصيل حياته الشخصية، ومسيرته الفنية.

أبرز تصريحات أحمد الفيشاوي التلفزيونية

– أنا بستخدم آلاف الأقنعة، منهم إني أكون في مكان عام ولو حد طلب مني يتصور بضطر أبتسم.

– من 3 سنين من آخر زواج ليا كنت شخص عصبي جدًا ومكنتش مبسوط من نفسي، وبعد ما بقيت حر ومعنديش حد في حياتي إلا عيالي بقيت مرتاح أكتر.

– عمري ما شيلت تاتو ولا هشيله، وأنا عمري ما ندمت على تاتو عملته، والتاتو ده من أيام الفراعنة وكانوا بيدقوا بخشب وقتها.

– شاب صعيدي شافني في أول يوم ليه في المدينة، وقالي هو الوشم اللي أنت عامله ده مش كُفر؟ قولتله طيب هي جدتك كافرة؟ قالي لأ طبعًا، قولتله طيب هي مش عاملة في ذقنها؟ قولتله يبقى كُفر إزاي؟ والفكرة أن التاتو فلكلور شعبي.

– الست بتبقى كاملة كمضون والشكل بييجي بعد المضمون مباشرة.

– عمر ما كانت أفلامي بتجيب إيرادات عالية، وأهم حاجة إن المنتج راضي عن التجارب.

– اعتذرت عن أولاد رزق 3 بسبب عدم توافق الوقت، ومش متضايق أني اعتذرت لأني كنت بعمل فيلم السيستم وقتها.

– الأستاذ العظيم فاروق الفيشاوي أبويا الله يرحمه، كان بيقولي أنت مش ملك نفسك، أنت ملك الناس.

– أنا مفاتنيش أي حاجة ومولود في بوقي معلقة دهب، وأنا بعشق الفلوس.

– لو أنا عند دكتور نفسي هقول يارب احرق كل الناس اللي بتموت الأطفال والستات والعواجيز في بيوتهم.

– بندم على مرحلة طفولتي ندم شديد، لأني كنت طفل شقي جدًا وتعبت الكل معايا.

– عمر ما أبويا زعق لأمي قدامي، وحتى طلاقهم مأثرش عليا.

– أنا بهرب من الشرب والمخدرات بقالي 7 سنين، وقبل كده كنت مش مهتم ومش مستوعب، ولكن دلوقتي استوعبت أن عندي 43 سنة وأني بكبر مش بصغر وأني لازم أهتم بنفسي وشغلي، وأعتقد أن الموضوع بيتحسن.

– أنا كنت سلفي وبقيت صوفي وكنت إخواني لمدة سنتين وعمي الله يرحمه كان تكفير وهجرة، والإنسان على طول عنده تناقدات، وأنا لسة معرفش ولسة بدور على معنى الدين، وربنا رب قلوب.

– أنا اتغيرت كتير جدًا وأنا بروح لدكتور نفسي من سنة 1997 ومغيرتهوش، وفي دكتور روحت له مرة وتاني يوم مات، تقريبًا حكيت له زيادة ومقدرش يكمل، وأنا دلوقتي معنديش مشاكل وده بعد سنين.

– أنا زعلان من ناهد فريد شوقي والحي أبقى من الميت، بس هنعمل إيه الله يرحمها ويسامحها، وهي اللي كانت مزعلاني مش أنا اللي زعلتها.