وفاء سالم تكشف تفاصيل تشوه وجهها

متابعة/ حسانة سليم

كشفت الفنانة وفاء سالم ما حدث معها بسبب أخطاء طبية في عمليات تجميل سابقة أدت إلى تشوه وجهها.. وقالت وفاء سالم في مداخلة هاتفية مع الإعلامي عمرو أديب عبر برنامجه “الحكاية” على قناة MBC مصر إنها وصلت لمرحلة خطرة بسبب الحقن الخطأ موضحة:”على مدار كذا سنة كنت تعرضت لحقن وخيوط عند دكاترة مشاهير كل مرة أروح لدكتور يعملي حقن على أساس أنه هيصلح العيب اللي حصل من الدكتور اللي قبلة، الأعمال الفنية اللي كنت بشترك فيها بتفرج على النتيجة ألاقي تشوهات في وشي والناس وأصدقائي مكسوفين يقولولي عندك خد غير الخد التاني وكان أدائي في الأعمال مضايقني إزاي أمثل وأنا في تشوهات في وشي، وصلت لمرحلة أني مش عاوزة أروح لأي دكتور لأن كل مرة يقولولي مش هنقدر نتعامل مع الحالة دي لأن وصلت لحقن في مناطق أعصاب لغاية ما قابلت دكتور سمير غرابة وقالي إحنا محتاجين قبل العملية نعمل أشعة واكتشفنا وجود صديد واصل للشبكية والمخ، وربنا أنقذني وأنقذ حياتي”..

وتابعت وفاء سالم موضحة: الصديد من الحقن اللي كان بيتحقن لي زعما أنه هيصلح الحقن اللي قبله وكان بيبوظ وشي وخيوط كانت جوا وشي علشان تشد الوجه، وأنا كنت بتعرض لشكل من أشكال الإبتزاز.. وأكدت وفاء سالم إنها الآن عادت إلى حد ما لشكلها الطبيعي مضيفة: “أنا مش عاوزة أي عمليات تجميل أنا عاوزة وفاء اللي الجمهور حبها..وكان استشاري التجميل د.سمير غرابة نشر فيديو عبر صفحته على موقع Facebook للفنانة لوفاء سالم تكشف فيه عن تفاصيل الجراحة الجديدة وتشرح فيه طبيعة حالتها.. وقالت وفاء سالم: “مبسوطة إني مع الدكتور سمير غرابة، وجيت عشان عندي مشاكل عملتلي ضغط نفسي لدرجة إنني مش بحب أشارك في أعمال فنية، عملولي خيوط والخيوط عملتلي تلفيات، واتعملي حقن غلط في وشي. احساسي بالرضا عن نفسي مهم جدًا. معرفش إذا كانت العيوب دي واضحة ولا لأ بس أنا بشوفها وبحسها لما بلمس وشي كتير”..

وسبق وكشفت وفاء سالم سبب قلة مشاركتها في الأعمال الفنية موضحة: “غصب عني مش بيبقى علي الطلب اللي حابة أكون عليه، لكن بابقى مبسوطة من حب الناس.. وقالت إن قلة الأعمال المعروضة على الممثل تضعه في صراع مع نفسه بين رفض أعمال لا تناسبه وبين حاجته للعمل، وهو ما تكرر معها، لكنها تحاول اختيار الأعمال التي تغضب الجمهور، مضيفة: “شيطان الواحد بياخده أن يلا اشتغلي، بتحصل بس بقول مش هعمل كده تاني”